Shy Blue

Shy Blue (7989) 10/08/1993 (S. Sorano) Double light blue pansy. Variegated dark green and white, plain, pointed, glossy. Semiminiature




african violet

長者真厲害！

話說又到一年一度既書展，又係去趁墟執平書的大日子！長者唔止執平書，重唔執輸添。

大熱天時，大家都無乜地方好去，去書展唔單止可以嘆冷氣，重有得執平書，唔去就笨，大家一窩蜂湧晒去，攪到書展門口打晒蛇餅，排隊無得三幾粒鐘都咪使旨意入得到會場，排隊都無所謂喇，但露天排隊，無冷氣，人又多，大汗疊細汗，你都咪話。但係咁辛苦，d長者都要迫入去為乜呢？除左嘆冷氣、執平書，重有就係要特衰政府加生果金！原來d長者聽聞財爺會去書展攪座談會，扮親民，搏攞分，d長者見有此良機，重唔晨早排隊，入去會場霸番個靚位，準備面對面要你特衰政府加生果金，咪好似上次咁，阿婆叫BT加生果金，越叫越走，睬都唔睬下，諗起就嬲！

好喇，財爺今趟打響鑼鼓，話人知會帶埋BT針一齊去書展做親民show，長者見有機可乘，兼夾順便執平書，一於一早到場，擔定凳仔等財爺，叫佢加生果金，睇下到時喺咁多人面前，又困住係會場，仲有得避！

鑼鼓一響，財爺高談闊論知識如何創富，BT針係處慢打鑼之際，有一獨眼長者突然起身，大聲道：「財爺，我想講下綜援既野，你喺財政預算度畀多個月綜援，我認為唔使咁做喇，因為佢地老早食緊政府福利，做乜仲要收咁多？不如畀多一千蚊過無領綜援既長者好過喇…」仲未講完，主持人打斷長者發言，但係長者都唔弱，立即以字正腔圓既英文回敬： 「Please listen to my question！我只係想財爺正視呢群無攞綜援既長者，佢地對社會有貢獻，有骨氣，唔想靠政府，所以政府更加應該照顧佢地…」

場內「實Q」立即上前安撫兼攞走長者支咪，主持人示意財爺快d回應，免得其他人起哄，但財爺未及開口，又有聽野麻麻地既長者大聲猛講：「聽唔到，大聲d！」BT針忍唔住幫口，叫長者畀財爺答左先，呢位長者中氣十足講：「我只係要你答我會唔會派一千蚊，好簡單！」喺度趁熱鬧既人同其他長者大笑起來。

你一言我一語，攪左成十分鐘，財爺至有機會回應，佢話聽到長者既聲音，又話政府會考慮考慮，叫長者唔使太擔心。呢d咁既公關回應，真係聽到悶。

今時今日既長者真係唔講得笑，佢地鍥而不捨，又識走位，後生仔學野啦！

徵求靚花

網上見以下留言。

麻麻美雅：「最近好鍾意呢隻靚花，唔知大家有無球根、種子、小苗、成株？如果有既話，請pm我，希望要特別 d ，謝謝！」

森美阿巴：「你想要幾特別呀？」

麻麻美雅：「咁你有d乜？希望唔係花墟貨色囉。」

森美阿巴：「我乜都有，錢你又有幾多？」

…

民望於我如浮雲

昨日，除左大舊石既「親疏有別」一石激起千重浪外，計數界議員Madam譚又激中BT死穴。

BT近期認真唔老泥，民望插水，仲係唔及格果隻，Madam譚唔知有心整蠱定係乜，喺口水大會提及BT民望插水，同股市有得fight，BT幾乎頂唔順，想兜巴星佢，但係記起BT嫂喺佢臨出門時，畀左張粉紅"忍"字咭過佢，喺衫袋捻出來睇左一眼，諗起人地阿爺睇緊直播，唯有嗗聲吞左啖氣，同Madam譚講左句肺苦之言：「民望對我來講，好似浮雲咁啫。」

坐喺電視機前面既一眾小民，聽完BT咁講，即時諗起超記同佢間福佳超市：「不義而富且貴，於我如浮雲。」間福佳超市靜靜雞先加後減，加幅大過通脹，仲要要脅代理，除左上架費，如果代理賣野平比其他商舖，間福佳超市以後唔入佢d貨。你話呀，呢d富貴，到底義唔義呢？喺呢d咁既環境下，一眾小民認真既福且佳囉。

BT釋「親疏有別」真義

昨日，BT去左特衰立法會一年一度既口水大會，其精彩演出，真係令人嘆為觀止！

尊貴既立法會議員大舊石問BT，會否放棄其「親疏有別」既思維？唔知BT係唔係國文老師上身，亦或當左立法會係課堂，尊貴議員係學生？侃侃大談何為「親疏有別」，同埋其準確意思，佢一臉認真，循循善誘咁細解：「所謂親，就係親近市民，以市民利益為優先；所謂疏，就是疏遠市民，以從政者的政治為優先。」電視所見，班長與及各大小學生莫不聽得目定口呆。

兩年前，BT曾表示政府和社團的關係有「親疏」，籠統來說，與保皇黨既關係密切過泛民。BT既喉舌報怕大家讀得書少，聽唔明，再加展釋，曰「親疏有別」論只是表示BT政府及其管治班子對待各社團既態度有所差異，blah blah blah，諸如此類，等等。

今聽得BT又另作解釋，眾人一時間唔知邊句真邊句假咯。