一咭傍身保平安

Confessions of a Subprime Lender - Richard Bitner
1. 永不相信房地產經紀
2. 永不相信按揭代理商
3. 永不相信估價人員
4. 永不相信華爾街與評級機構
5. 永不相信惡名昭著的金融界遊戲規則

華爾街與塗上口紅的豬 - 葉輝
6. 永不相信銀行職員的推銷

SillyGirl
以後去銀行，好似煲呔咁，袋定張咭喺衫袋或者褲袋，銀行職員講乜，都拎張咭出來睇，咭上寫住"永不相信銀行職員的推銷！"幾個大字。

一個麻木不仁 一個喪心病狂

一段心酸的日子…

呢個幾月，剩係得兩單嘢，一單美國既雷曼兄弟銀行執笠，引發全球金隔海嘯，香港不少人買左雷曼債券，家下不知幾傍惶，分分鐘渣都無，當中有唔少係畢生積蓄，更且係一分一毫咁樣儲番來，咬開有血有汗。其中有部份平時做開定期，銀行同佢地講，依家d息咁低，有無諗過將d錢放喺第二度賺多d息？呢樣同定期無分別，息會高d。查實，利息不過比定期高一厘，但係風險奇高。爆左出來，好多專家都話呢d毒債券複雜，佢地都要睇好耐，至知舊嘢賣d乜。

依家爆煲，雷曼冚旗，買左累人債券既，分分鐘全家富貴。苦主唯有四處奔走投訴，望能攞番血汗錢。

賣毒債券既無良，話人輸打贏要既係麻木不仁。

另一單，就係人地偉大祖國，有大品牌廠商賣毒奶粉，隻奶粉係畀BB食架!!!BB食左呢d毒奶粉，會生腎石，有BB因此死亡，有本地泌尿科醫生話，BB生腎石，分分鐘要成世洗腎。BB都毒既人，快d死，打落十八層地獄，永不超生。

賣毒奶粉既喪心病狂，包庇賣毒奶粉既喪盡天良，隱瞞真相既埋未良心。

給克勤哥哥的信

Dearest 克勤哥哥，

仲記唔記得我地呀？我地係永遠都支持你果班學生哥呀！我地好羡慕你，你篇網誌出左幾日，就有四百幾個回應，仲唔計刪左果d，你真係叻！

我地將你呢篇網誌背熟左，準備考作文時用，一定攞滿分，到時你要請我地去荔枝團架。

克勤哥哥，我地今日好激氣！ 今日我地成班同學諗住搵份part-time做，搵番多少pocket money，見工時老闆問我地最叻做d乜，要幾多人工。我地話最叻影印，人工七皮一個月啦，收少你架喇。點知個老闆粒聲唔出走左出去，跟住攞把掃把入來，將我地掃地出門，真係無良！

克勤哥哥，立法會開鑼，你一定要立最低工資，最少七萬一個月，咪等果個無良顧主以為我地呢班學生哥好好蝦，我地有克勤哥哥撐架！

一群永遠支持克勤哥哥既學生哥上

+ + +

親愛的克勤哥哥，

我地最聽克勤哥哥話，所以今日我地喺學校響應克勤哥哥全民驗"殊殊"計劃，為左保証同學無襯出去食晏時，食埋晒d古靈精怪野，同學食完晏返學校，人人都要驗"殊殊"，點知又畀老師罸企教員室門口，今次仲要人人掛個牌，雞乸咁大隻字寫住"下幼低B班最無恥！"…嗚嗚！

克勤哥哥，你今次一定要幫我地出氣，要正式譴責校方迫害學生。

一群永遠支持克勤哥哥既學生哥上

+ + +

克勤哥哥，

我地最鍾意聽你唱歌，特別係英文歌，有同學仲將你個最新歌曲做左電話鈴聲，佢好好人，俾埋我地用，我地成日你打電話俾我，我打電話俾你，就係為左聽你首歌，點知今朝老師聽見，佢話我地鹹濕，要我地全部電話刪左隻歌，仲要我地喺教員室門口罸企，嗚嗚。

我都鍾意克勤哥哥，鍾意你唱歌唱得好，又想聽歌學英文，點知老師咁蠻不講理！

克勤哥哥，你喺立法會，一定要為我地學生哥爭取人權！

一群永遠支持克勤哥哥既學生哥上

傻女俠信箱

傻問Q1 ：乜野係專家？
傻答A1 ： 專業栽培病蟲蟎害非洲紫羅蘭既園藝家。賣一送一千(蟎)，幾抵呀！

傻問Q2 ： 聽講用1:1000可以殺死d蟎，係真唔係？
傻答A2 ： 家居清潔都要用1:99喇，用1:1000殺得死d蟎，你信呀？恭喜你囉！如果1:1000真係得，果d由專家主理既花場農舍，都唔使三朝兩日咁落葯，仲係攪左兩三年都未掂。D葯樽上面寫住"毒葯"架！如果1:1000 得，邊個會咁冒險用葯呀。

傻問Q4 ： 點解d人咁鍾意中傷人，話專家主理既花場農舍，出售中左招既花畀人？
傻答A4 ： 唱衰一日，唱好三年。係人都揀易果隻啦！

傻問Q5 ： 有無辦法可以一百巴仙解決d極之討人厭既mites？
傻答A5 ： 既然看官咁畀面，下馬問前程，梗點條光明大道過你行！呢條獨步秘方，既環保，又安全，仲百份百有效。嗱，聽住啦。係……膠袋……一了百了，保証佢地永無翻身！夠毒卦，哈哈！

傻問Q6 ： d番網話種堇最好係18~21度，仲話超過27度，d花會減慢生長，同埋逐漸少花。但係蟲蟎大師主理既農舍成28度，仲同人講呢個係種堇最合適既溫度，咁炎夏時，幾時至要開冷氣？真"拗"頭！
傻答A6 ： 蟲蟎大師主理既農舍，以推廣非洲紫羅蘭為己任，謀利為副，花要食肥，人要吃糧，燈油火蠟，天一光就要錢，梗係呢度慳d，果度慳d，將冷氣機既溫度略略調高些少，年中都慳番唔少架。如果唔慳d，一旦大吉利是關門大吉，點推廣非洲紫羅蘭呀？最衰都係d人，做乜咁眼利，個溫度計已經細細個架喇，都畀佢地睇到。或者，遲d蟲蟎大師搜羅d"你睇唔到"既溫度計返來用都唔定。

傻問Q7 ： 嚴冬快過，炎夏又至，d花至話剛剛出蕾，真係驚趕唔切夏天前開花，你話種來為乜？
傻答A7 ： 唉，同聲一哭！

傻問Q8 ： 既然係天地學堂，我都來學下野。請問點樣整又脆又唔肥膩既春卷？
傻答A8 ： 真係好事傳千里喇，d人咁快就知天地學堂開左張。"壇主"，你老懷安慰啦。
Well，言歸正傳，又脆又唔肥膩既春卷簡單昜整。去麵店買春卷皮，或者去超市買急凍既都得，如果係急凍既，按包裝說明解凍。餡料方面，各有喜好，注意，少少汁就可以，太多汁既話，d皮會唔脆。煮好餡料，攤凍，春卷皮放上餡料，捲好。昜潔平底鑊，塗薄薄一層油，放下春卷，細細火反覆煎至兩面金黃卜卜脆，食得！

傻問Q9 ： 想砌一個有8層既花架，建議每層應該幾高? 實逓日本城之類只有五六尺高咋，在那裡至買到有8層? 我屋企無花園又無十幾尺樓底o架，要放得落至好!
傻答A9 ： Easy 啦，買兩個日本城之類只有五六呎之層架，將之疊起，斷估你玩過層層疊卦，用電線紥起佢地，如果高得滯，鋸之哉！唔o岩鋸到o岩。每層應該幾高，你鍾意啦，我地好民主既！

注意 ： 一切風險，閣下自負，與本信箱無關！

傻問Q10 : 而家AV界有幾多隻十字葉品種??? 我見有D無知既井底之蛙話得3隻咋，真的嗎?
傻答A10 ：有幾多隻就唔清楚，肯定多過三隻，除左Rob’s既 Lucky Penny, Lucky Charm 和Lucky Ducky，仲有 Harmony's Little Stinker - (Harmony) Semidouble dark blue/variable white eye. Variegated medium and light green, cream.
如果有人話得三隻十字葉，原諒佢啦！

傻問Q11 ： 煲呔萬歲！，請問傻女俠，我地愛堇人士點做來響應煲呔呢？
傻答A11 ： 我會種好呢盆花！

傻問Q12 ："尋"晚明明睇緊翡翠台，忽然有人o係度講番話，以為部電視short左，跳左去明珠台。聽真d，其中一個都似d番文，不過另一個…唉，似足網上d翻譯器，逐隻逐隻中文咁譯英文，出番來，係呀，隻隻英文你都識，不過合埋就唔知佢講乜，就算跟足d online translator，譯返轉頭，都仲要執一輪至知佢講乜。睇真d，原來佢地都係"人"來架！傻女俠呀，究竟點解d"人"要o係翡翠台講番話呀？
傻答A12 ： Oh, really? It sounds interesting. Did you record it? If you did, can you share it with us? Or, upload it to YouTube? Oops…唔好意思，講左番話添。答番你既問題，搏d觀眾英文水平低，就算講錯文法，都無人知。奉勸 ：

兄台英文水平高
以後轉睇明珠台
唔使聽到頭都痛

傻問Q13 ： 好驚呀！真正個醜人不知羞蒲頭喇！使唔使報警呀?
傻答A13 ：999誰是真兇手？唔…我好鍾意睇架，早果輪電視重播，我都有睇，真係百看不厭。想搵番隻DVD珍蒧，各方好友，若然知道邊處有得賣，麻煩講聲呀，唔該！噢，問緊要唔要報警呵，岔開左添。 :p 唔使驚，驚就兩份，報乜鬼警呀，擔定凳仔睇醜劇好過啦。呵呵～

p.s. 記得錄低佢喇，分分鍾一夜之間"網"間蒸發架，又唔係未試過。

傻問Q14 ： 恭喜傻女俠新春愉快，一年靚過一年！傻女俠，我d fan今晚來我屋企拜年，間屋亂糟糟，執唔切，點算好？
傻答A14 ： 哈哈，多謝！Well，執屋之嘛，幾亂都無有怕，最緊要有地氈，將d污糟野，唔見得光既野，嘈喧巴閉既野，一野剷晒落地氈底，眼不見為乾淨，要幾和諧都得！

AV and Mites

非洲紫羅蘭和蟎害

侵害非洲紫羅蘭的蟎主要有兩種，cyclamen mites和broad mites，蟎極細小，單憑肉眼，很難看見，可用廿倍或以上放大鏡察看，蟎怕光怕熱，愛吸食葉的汁液，吸食汁液同時，注毒液入葉片內。

蟎傳染力廣，殺蟎葯甚毐，對人畜有害，用葯也極難根治，家居種植，切勿使用，一經發現，立即棄之，杜絕後患。

以下是染蟎病株圖片。





african violet mites