花花私語 第一回 俏妹妹憂一夜白頭

彩虹小甜甜：今日天氣真係熱，成三十幾度，熱得我周身唔舒服，SillyGirl幾時至返來呀？

花塔餅： 今日又真係幾熱，不過呢，俗語有云：心靜自然涼。

殺牠死：你兩個靜d啦！嘈嘈嘈！！！

彩虹小甜甜： 喂呀，殺牠死大哥，小妹呻句唧，你唔好咁大聲，嚇到班細既震晒。

殺牠死： 果個SillyGirl幾時返？冷氣唔開都算啦，出街都要記住開風扇，真係離晒大譜，@$ …… (下刪五十字)

花塔餅：殺牠死大哥，你咁嬲，咪熱上加熱，等我唱首歌幫大家消消暑…. lala….la….

殺牠死：STOP STOP STOP！好難聽呀！

花塔餅：唉，好心無好報。

彩虹小甜甜：喂喂，花塔餅呀，算吧啦，咪攪到佢好似呀邊個，呀邊個呢？呀，YY博士果d咁，一夜之間，嗚嗚….. 真係聞者傷心，見者流淚…. 嗚嗚……

花塔餅：甜甜妹妹，你唔好咁傷心啦，花去花還在，六個月後又一棵好花。

彩虹小甜甜：咁又係，雖然我地唔係好熟，但係都叫做見過下面，咁就無….

殺牠死：係囉，話時話，我都見過佢一次，佢果陣幾好架，忽然間就話無左。

彩虹小甜甜：乜你唔發脾氣喇？

殺牠死：頭先熱得滯至係咁，唔好嬲。知唔知點解攪成咁？

彩虹小甜甜： 唔知呢，聽見SillyGirl同佢d fan 講得慶高彩烈，突然間無晒下文，攪到我幾晚瞓唔著。

花塔餅： 幾晚瞓唔著？點解呀？

彩虹小甜甜： 我怕自己唔知會唔會好似佢咁樣？一夜之間 ….

殺牠死：唔好咁傻啦，咁易咩，實係有暗病，我話既，d人曚查查就真，呢個世界邊有一夜白頭d咁既事，你估家陣做戲。

彩虹小甜甜：殺牠死大哥，你都講得幾有道理。

花塔餅：係囉，甜甜妹妹，我唱首歌畀你聽，等你開心番。la….lala…

彩虹小甜甜：得啦，得啦，我無事，你唔使唱啦。咦？開門聲，梗係SillyGirl返來啦！


窗外藍天白雲，艷陽高掛，真是美好的一天。