花花私語 第二回 眾小堇嚷著要搬家

遠處傳來一陣嘈吵聲……有無攪錯呀，困住我地咁耐……黑麻麻，放我地出去呀！……不見天日，水又無得飲，想謀殺呀！……蛋散，我好驚，嗚嗚……你唔好喊，等我再叫大聲d，一定要叫到有人放我地出去…… 有無人呀？搵個人應下我地都好呀！喂！！！……

彩虹小甜甜：咦？邊個一早咁嘈呢？

花塔餅：甜甜妹妹，早晨！你今日咁早起身？

彩虹小甜甜：早晨，花塔餅。原本瞓得好好，唔知邊個一早係度咁嘈，嘈醒左。

花塔餅：係喎，邊個咁嘈呢？喂，邊位呀？咁早，嘈住人地瞓覺架。

蛋散：我地呀，我地想出來呀！

花塔餅：你地係邊度？點稱呼？

蛋散：我叫蛋散，我地係個紙袋入邊！

花塔餅： 蛋散老兄，我叫花塔餅，你地乜野事？

蛋散：花塔餅，我地係個袋入面好多日，呢度黑麻麻，來左咁耐水都未飲過，我地好口渴。d細既又好驚。

花塔餅： 甜甜妹妹，我估又係SillyGirl係公司帶佢地番來分苗、換盆，放係度無理佢地。

彩虹小甜甜： 唉，上幾次又係咁，丟低十幾日唔理。

花塔餅：等我同佢地講聲，叫佢地唔使咁擔心。喂！蛋散老兄，你地唔使擔心，之前都有廿幾三十個兄弟姐妹都係咁，SillyGirl 將佢地丟低十幾日唔理，之後換左盆，飲左水，無事啦，你叫d細既唔使驚。

蛋散： 花塔餅，你知啦，呢度黑麻麻，不見天日，又無水飲，唔驚就假。希望SillyGirl快d幫我地換盆，畀d水我地飲。

花塔餅：蛋散老兄，我地都唔係好得過你地好多，果個SillyGirl記得就畀d水我地飲，唔記得，成個禮拜水都無滴，d泥乾到些少風都吹得走，上次仲離譜，大熱天時，出街連風扇都唔記得開，你話呀，果個SillyGirl學咩人種花！

彩虹小甜甜：係呀係呀，咁無記性就唔好種花啦，H2O同我講，佢話係Pat姐姐屋企個時不知幾好，Pat姐姐照顧得佢地好好，水啦，肥啦，溫度啦，濕度啦，哎，我都講唔到咁多，總之樣樣都剛剛好，如果果個SillyGirl仲係咁，我地一於搬去Pat 姐姐屋企住！

蛋散：甜甜妹妹，Pat姐姐屋企真係咁好？我都想搬去住。

彩虹小甜甜： Of Course！

……我又去！ …… 我都去！…… 記得叫埋我！……