花花私語 第五回 炎夏至嚴防SillyGirl瞎攪

彩虹小甜甜：嚇死人啦！

花塔餅：甜甜妹妹，乜野事咁驚?

殺牠死：甜甜妹妹，唔使驚到d葉都變晒色，話我知，萬大事有我。

彩虹小甜甜：你地有無聽見SillyGirl同d fan講，話乜野係高溫底下種AV喎。

花塔餅：呢輪咁熱，都無乜心神聽佢地傾偈，只係隱隱約約聽到乜野三十幾度，又話乜野攞幾株試下。

殺牠死：我以為乜野咁大件事，呢單野我知，初初以為有乜野大發現，聽聽下就知無料到。聽咁耐，你地有無見到乜野真憑實據呀，班人得把口，佢話佢有幾多株花就算係高溫都生得幾好，佢又話佢有株乜乜物物係高溫底下仍然開花開得好靚，花呢？你地有無見過?

花塔餅：殺牠死大哥確係英明神武，心水清。畀你一提，諗下諗下，又真係無見過d花花。話時話，就算佢地攞d相出黎都唔好信，點知幾時影，佢地講幾時幾日影既都得喇，邊個知。

彩虹小甜甜：佢地真又好，假又好，都唔關我事，我最驚係SillyGirl 傻起上黎，真係將我地擺係高溫處，咁我就命仔難保喇。

殺牠死：唔會卦？雖然我夠強夠壯，但係如果果個SillyGirl 真係咁攪法，睇怕最多得番半條命仔。

花塔餅：嘩，咁仲得了！點算呀？

彩虹小甜甜：咁樣？咁樣？呀！不如咁啦，有乜依郁，立即搬去Pat姐姐屋企啦。

殺牠死：我地咁大棚，我驚Pat姐姐屋企住唔晒。

花塔餅：點算呢？點算呢？諗到啦！我地分散住喇，我聽綠仔講，佢話Rowena姐姐照顧得佢地好細心，好鍚佢地。我地一d去Pat姐姐屋企，一d去Rowena姐姐屋企，掂！

彩虹小甜甜：唔……都好，咁我都定d。

殺牠死： 大家醒定d，睇住SillyGirl，有乜唔對路既話，我地就立即行動。


知道！…… 收到！……你記住啦，睇實SillyGirl啦。………