花花私語 第四回 道老伯談種花真諦

道可道：好彩呢幾晚無咁熱，如果仲好似上兩個星期咁熱，我d老根老葉都怕捱唔住，要去堇天堂囉。

彩虹小甜甜： 道伯伯，你唔好咁講啦，你老當益壯，長命廿載架。

道可道：甜甜，你最識氹我開心。

彩虹小甜甜：道伯伯，我講真架。雖然你大過殺牠死大哥好多，但係呀，睇起上來，你d葉啦、根啦，同佢唔差得幾多，如果我好似道伯伯咁老時，似得你依家咁樣就好啦。

花塔餅：係呀，我都係咁諗。道伯伯，你點樣可以keep 得咁fit？教下我，等我又one 磨，two磨。

殺牠死：係囉，道伯伯，講d心得來聽下，等我地d後輩學下野都好。

道可道：你地個個都咁好學，真係乖。其實道理好簡單，順其自然囉。

彩虹小甜甜：道伯伯，咁即係點呀？

道可道：道可道，非常道。

花塔餅：道伯伯即係道伯伯，講野成日都係咁玄。

彩虹小甜甜：殺牠死大哥，咁你明唔明？

殺牠死：甜甜妹妹，我道行淺，或者到我好似道伯伯咁老時，都怕且明卦。

道可道：大個就明架啦，好夜喇，大家早d瞓啦。

彩虹小甜甜：原來咁夜喇，點解SillyGirl仲未返？

花塔餅：梗係又係開會啦，佢老細short架，時時都係下畫四五點至話開會，一開就幾個鐘。

彩虹小甜甜：係呀，佢老細最鍾意講野，你問一句，佢呀，可以講足成個鐘唔停。

殺牠死：咪係，正一你講一句，佢頂萬句。

道可道：無法啦，依家搵食艱難，有得做都好過無得做。

殺牠死： 道伯伯，我都知搵食艱難，但係人地有屋企架。我估果d人，一係無屋企，一係無人等佢地返屋企，再唔係，就係同屋企人唔o岩。你話呀，邊有人夠鐘放工，都唔想番屋企！

花塔餅：果d就係唔係人，咪唔想走囉！

道可道：正所謂，一樣泥種百樣花，人咪又唔係一樣。

彩虹小甜甜：希望SillyGirl頂得住啦。


窗外明月清風，可是，有幾多人能放下心中所求所慾，好好去享受呢？